Кафка: Өчигдөрхөн Пауло Коэльо -гийн "Алхимич"-ийг уншчихлаа...Нэрийг нь сонсоод л яваад байсан , ойрд үнэндээ ном шагайх зав олдсонгүй. Ерөнхийдөө үйл явдал агуулгын хувьд энгийн юм шиг мөртлөө цаад санаа нь маш гүн бичигджээ. Сантьяго гэдэг жирийн хоньчин залуу өөрийн зүүд болон хүсэл эрмэлзлэлдээ итгэн эрдэнэсийн эрэлд явж байгаа тухай... "Чи үнэхээр хүсэж л байгаа бол орчлон хорвоо түүндээ хүрэхэд чинь тэр чигээрээ туслах болно" гэсэн зохиолын цаад ерөнхий санаа.

Яг үнэндээ амьдралаас хэт хол юм шиг мөртлөө маш ойртуулж бичжээ... Ерөөсөө л хүний хувь тавилан, аз жаргал, зовлон бэрхшээл бол хүний хүсэл эрмэлзлэлийн тодорхой биелэл. Бидний сэтгэл зүрхэнд далд болон ил хүсэл эрмэлзлэлүүд үргэлж оршсоор л байдаг. Магадгүй далд хүсэл эрмэлзлэлүүд бидний зүүдээр дамжин илэрдэг биз. /Фройд ахынхан сайн мэдэж байгаа байх/. Тиймээс хүсэл гэдэг маш чухал. "Би хааяа өөрийгөө үнэхээр утга зохиолын төвшинд /олон нийтийн буюу нийт масс-д зориулагдаагүй - ямар нэгэн ашиг сонирхлын үүднээс бий болоогүй/ яригдах хэмжээний жүжиг биччихсэн түүнийгээ тайзан дээр хэрхэн тоглогдож байгааг нүдээр үзэж буйгаар төсөөлөх үнэхээр дуртай... " хэдийгээр ор үндэс нь одоогоор тодорхой биш хэдий ч ямарч байсан миний сэтгэл зүрх, оюун ухаанд ийм хүсэл эрмэлзлэл байна гэдэг үнэхээр чухал. "Хүний үнэ цэнэ хүсэл мөрөөдлийнх нь үнэ цэнээр хэмжигдэнэ" гэж сайхан үг. Тиймээс хүмүүс бид сайхан хүсэл тэмүүлэлтэй амьдрах ёстой. Бүхий л цаг үеийн турш яригдаж буй сонгодог хийгээд гайхалтай зохиол бүтээлүүд  бүгд л жинхэнэ гуйвшгүй хүсэл эрмэлзлэлийн үр дүнд бий болсон. Тэрхүү зохиол бүтээлүүд хэзээ ч ашиг сонирхлын үүднээс бий болоогүй , зөвхөн хүсэл сэтгэлийн үүднээс бий болсон болохоор хүний дотоод сэтгэл, оюун ухаанд нөлөөлөх чадвараараа тэргүүн зэрэгт байдаг биз...

Үхлээс , ядуу зүдүү амьдралаас, зовлон бэрхшээлээс бүү ай ! Харин хүсэл мөрөөдөлгүй амьдрахаас ай! Хясал бол хүслийн энгийн нэг дагавар...